Արտամետ գյուղի ամենասպասված աշակերտը 6 տարին չբոլորած Մերին էր։ Մերիի ներկայությամբ էր որոշվելու դպրոցում առաջին դասարան լինել-չլինելու հարցը։
Այս տարվա սկզբին կանխատեսվում էր, որ Արտամետի դպրոցը սեպտեմբերի 1-ին կունենա 5 առաջին դասարանցի, սակայն 4 ընտանիքներ լքեցին գյուղը և առաջին դասարան լինելու հարցը կարող էր լուծել միայն Մերին՝ իր ներկայությամբ։
Մերիին դպրոցում հիասթափություն էր սպասվում, քանի որ աղջնակը սովորելու էր երկհամակազմ դասարանում, հինգ 4-րդ դասարանցիների հետ։

Արմավիրի մարզպետարանի Կրթության, մշակույթի և սպորտի վարչությունից տեղեկացանք, որ մարզի 111 դպրոցներից 19-ում կրթությունն իրականացվում է բազմահամակազմ դասարաններում, մասնավորապես 27 երկհամակազմ և 13 եռահամակազմ։
Համաձայն 2018թ․ օգոստոսի 30-ի ՀՀ կառավարության N 954-Ն որոշման, երկհամակազմ դասարանի աշակերտների թիվը չի կարող գերազանցել 15 աշակերտը, եռահամակազմը՝ 12-ը և քառահամակազմը՝ 8 աշակերտը։
Իրավական տեսանկյունից, ՀՀ Սահմանադրության 38 հոդվածի առաջին կետն ասում է, որ յուրաքանչյուր ոք ունի կրթություն ստանալու իրավունք, իսկ երկրորդ կետի տրամաբանությամբ՝ յուրաքանչյուր ոք ունի մրցույթային հիմունքներով պետական ԲՈւՀ-ում անվճար կրթություն ստանալու իրավունք։ Արդյո՞ք Արտամետի բարձր դասարանի եռահամակազմ դասարանում սովորող աշակերտը ստացել է մրցունակ կրթություն, որը հնարավորություն կընձեռի նրան օգտվելու ԲՈւՀ-ում անվճար կրթություն ստանալու իր իրավունքից։ Այս հարցին պատասխանում են համակարգում աշխատող մանկավարժները։

Փոքր համայնքներում՝ հատկապես սահմանամերձ, բազմահամակազմ դասարանները սովորական բնույթ են կրում։ Օրինակ, Տալվորիկի դպրոցում բոլոր դասարանները կամ երկհամակազմ են, կամ եռահամակազմ։ Բնական է, 45 րոպեում ուսուցիչն ամենամեծ ցանկության դեպքում չի կարող հասցնել ստուգել տնային հանձնարարությունները, նոր դաս բացատրել և եթե աշակերտների մոտ անհասկանալի հարցեր առաջանան, ինչպե՞ս է պատասխանելու այդ հարցերին։ Ենթադրենք, հայոց լեզվի ուսուցիչը ծրագրով նախատեսված թելադրություն է անելու, ասենք, երրորդ դասարանում, ինչո՞վ են զբաղվելու այդ ընթացքում չորրորդ դասարանցիները։