Թե ի՞նչ մեթոդաբանության հենքի վրա են տեղի ունեցել միավորումները, դժվար է գուշակել։ Բերենք մի օրինակ։ Մարզի Նորապատ համայնքին Արմավիր քաղաքից բաժանում է երկաթուղին։ Համայնքի բազմաբնակարան շենքերը մի քանի տարի առաջ միացվեցին Արմավիր քաղաքին։ Համայնքների միավորման ժամանակ ենթադրվում էր, որ Նորապատի մնացած մասն էլ կներգրավվի Արմավիրի փնջի մեջ, սակայն, ի զարմանս նորապատցիների, գյուղի մնացած մասն ընդգրկվեց Մեծամոր փնջում, այսինքն փողոցի մի կողմում Արմավիր խոշորացված համայնքն է, մյուս կողմում՝ Մեծամորը։ Ավելի ուշ, Կենտրոնական ընտրական հանձնաժողովի կայքում տեղադրված ավագանու համամասնական ցուցակներից հասկանալի դարձավ, որ Նորապատի կիսումը սերտ կապ ունի դեկտեմբերի 5-ին կայանալիք ընտրությունների և Մեծամոր միավորված համայնքի «Քաղաքացիական պայմանագիր» կուսակցության ցուցակը գլխավորող Վահրամ Խաչատրյանի հետ, ով Նորապատ համայնքի ղեկավարն էր, հետո նշանակվեց Արմավիրի մարզպետի տեղակալ, այնուհետև՝ Մեծամորի համայնքապետի ժամանակավոր պաշտոնակատար։ Ստացվում է Վահրամ Խաչատրյանը ժամանակին իրեն ձայն տված ընտրողներին իր հետ տանում է Մեծամոր։

Նորապատ գյուղը Արմավիր քաղաքից բաժանում է երկաթուղին

Նորապատ գյուղի կենտրոնական փողոցի ձախ կողմում՝ Մեծամոր խոշորացված համայնքն է, աջ կողմում՝ Արմավիր խոշորացված համայնքը

Ընտրության փիլիսոփայությունը հուշում է, որ քաղաքացին, հաշվի առնելով թեկնածուների առավելություններն ու թերությունները, հնարավորություն է ստանում կատարել ընտրություն նվազագույնը մեկից ավելի թեկնածուների միջև։ Փաստորեն Արմավիր միավորված համայնքի պարագայում քաղաքացին զրկված է ընտրություն կատարելու իրավունքից։ Առավելագույնը կարող է դեմ, կամ կողմ քվեարկել թեկնածուին, որը հեռու է ընտրության փիլիսոփայությունից։ Սա՝ մի կողմից։ Մյուս կողմից, եթե բավարար կողմ քվե ստացավ միակ թեկնածուն և նշանակվեց համայնքի ղեկավար, ի՞նչ օրակարգ են ունենալու ավագանու նիստերը։ Դժվար է պատկերացնել, որ ավագանու անդամը, կարևոր նախագծերին ընդդիմանալով, դեմ կամ ձեռնպահ կքվեարկի։ Փաստորեն, նման դեպքերում, նախագծի ընթերցումից հետո, միաձայն կընդունվի նիստի ամբողջ օրակարգը և նիստը կհամարվի ավարտված։

Արմավիրի մարզի համայնքների միավորումը նախադեպը չունի և դժվար է կանխատեսել, թե համայնքի ղեկավարը ինչպե՞ս կարող է իրեն դրսևորել բազմաթիվ և տարաբնույթ խնդիրներով լեցուն, միանգամից 3 տասնյակից ավելի համայնք ղեկավարելու պարագայում։ Սա ցույց կտա ժամանակը։

2021թ. դեկտեմբերի 5-ին Արմավիրի մարզի հասարակությունը համամասնական ցուցակով կընտրի 7 միավորված համայնքների ավագանի, որը ձայների մեծամասնությամբ կնշանակի միավորված համայնքի ղեկավար։
Մեկ օրինակով փորձենք համոզել օրենսդիրին, որ օրենք ընդունելիս կան իրադրություններ, որոնք հաշվի չեն առնվել։
Արմավիր միավորված համայնքում ավագանու ընտրություններում գրանցվել է միայն մեկ կուսակցություն։