ՀԱՅ ՁԿՆՈՐՍՆԵՐԸ ՄԱՍՆԱԿՑԵՑԻՆ ՁԿՆՈՐՍՈւԹՅԱՆ ՄԻՋԱԶԳԱՅԻՆ ԱՌԱՋՆՈւԹՅԱՆԸ
2022թ. սեպտեմբերի 7-8-ը Ռոսատոմի կողմից կազմակերպած միջազգային ձկնորսության մրցաշարին մասնակցում էին 10 երկրների 26 ձկնորսներ, որոնցից երկուսը ժամանել էին Հայաստանից։
Սեպտեմբերի 7-ին մեկնարկեց «Ռոսատոմ» ատոմային էներգիայի պետական կորպորացիայի կազմակերպած ձկնորսության երկրորդ միջազգային առաջնությունը։ Առաջնությունը տեղի ունեցավ Սոսնովիյ Բոր քաղաքում, Լենինգրադի Ատոմային էլեկտրակայանի հարևանությամբ։
Մրցաշարին մասնակցում էին 26 սիրողական ձկնորսներ այնպիսի երկրներից, որտեղ Ռոսատոմն իրականացրել կամ նախատեսում է իրականացնել ատոմակայանի կառուցման ծրագրեր, մասնավորապես՝ Հայաստան, Հունգարիա, Եգիպտոս, Հնդկաստան, Բանգլադեշ, Ղազախստան, Ուզբեկստան, Հարավային Աֆրիկա և Թուրքիա։ Հայաստանից առաջնությանը մասնակցելու համար հրավիրվել էին 2 ձկնորսներ և լրատվամիջոցներ։
Մինչ առաջնության մեկնարկը հյուրերին ընդունեց Լենինգրադի ատոմակայանի տնօրեն Վլադիմիր Պերեգուդան և մասնակիցներին ներկայացրեց ատոմակայանի անցած ուղին։ Մասնավորապես, Լենինգրադի ատոմային էլեկտրակայանի առաջին բլոկը շահագործման է հանձնվել 1973թվ-ին, այնուհետև կառուցվել են ևս 3 բլոկներ։ ԼԱԷԿ-ը 2021թվ-ին արտադրել է 30,9 միլիարդ կվ/ժամ էլեկտրաէներգիա։ Տնօրենը խոսեց ատոմակայանի անվտանգության համակարգերից, սոցիալական ծրագրերից և առաջիկա անելիքներից։ «Հնարավոր ամեն ինչ արվում է, որպեսզի իր ազգաբնակչությունն առողջ լինի։ Առողջ հասարակությունը նաև առողջ քաղաք է ենթադրում, - ասում է ատոմակայանի տնօրենը և ավելացնում, -այսօր ատոմակայանը տալիս է ամենամաքուր և ամենամատչելի էլեկտրաէներգիան»։
Պերեգուդան նշեց նաև, որ այստեղ պարբերաբար վերապատրաստում են այլ երկրներից ժամանած մասնագետների։
Հանդիպումից հետո միջոցառման մասնակիցները շրջայց կատարեցին ատոմակայանի տարբեր բաժանմունքներ և ենթակառուցվածքներ։ Հյուրերն այցելեցին կենտրոնական բլոկ, կառավարման կենտրոն, ծանոթացան անվտանգության և հովացման համակարգերին։ ԱԷԿ-ի պատասխանատուները պատասխանեցին մասնակիցներին հետաքրքրող հարցերին։
Սեպտեմբերի 8-ին Ֆիննական ծոցում կայացավ ձկնորսության առաջնությունը։ Տարբեր երկրներից ժամանած ձկնորսները 2 օրում որսացին 7 կգ ընդհանուր քաշով 203 ձուկ։
Մրցաշարի մասնակիցները կազմակերպված դոզիմետրիկ հսկողության շնորհիվ կարողացան ստուգել ոչ միայն Ֆիննական ծոցում ձկների առատությունը, այլև՝ դրա մաքրությունը։
Այս տարի մրցաշարի հաղթողները Հնդկաստանի ձկնորսներն էին` Արունաբհա Սաննիգրաին և Սանտոշ Ջայսվարը: Հնդկաստանի ձկնորսների ասոցիացիայի ներկայացուցիչները շնորհակալություն հայտնեցին կազմակերպիչներին հետաքրքիր փորձի համար։ Մրցույթի մասնակիցները հույս հայտնեցին, որ «Ռոսատոմը» կշարունակի նման մրցաշարեր անցկացնել, և նրանք ուրախ կլինն մասնակցել դրանց»։
Ձկնորսության մրցույթին Հայաստանից մասնակցում էին Արթուր Դոնդուրմաջյանն ու Արթուր Մարգարյանը, ովքեր նկատեցին, որ մեծ տարբերություն կա Հայաստանում և Ֆիննական ծոցում ձկնորսության ձևերի մեջ։ Այս ձևաչափով նրանք առաջին անգամ էին ձկնորսության դուրս եկել։ Մասնակիցների խոսքով, ուրախ էին ծանոթանալ և կիսել ձկնորսության փորձը տարբեր երկրների ներկայացուցիչների հետ, վստահ են՝ նոր հնարավորությունները կիրառելի կդարձնեն Հայաստանում։ Արթուր Դոնդուրմաջյանը ձկնորսությամբ սկսել է զբաղվել 12 տարեկանից։ Ասում է, որ մասնակցությունը մրցույթին արդեն ձեռքբերում է իր համար, քանի որ ծովում ձուկ բռնելու փորձ չի ունեցել։ Բացի դա, ձկնատեսակների տարբերություններ կան, որոնք այլ մոտեցում են պահանջում։ Արթուր Մարգարյանն էլ կարևորում է գործընկերների հետ ծանոթությունները, մասնագետների հետ շփումն ու նոր ձկնատեսակների որսի հնարավորությունը։
«Ռուսատոմ-Միջազգային ցանց» մասնավոր ձեռնարկության նախագահ Վադիմ Տիտովը նշեց․«Չնայած միջոցառումն այսքան լայն միջազգային մասշտաբով անցկացվում է երկրորդ անգամ, Ռոսատոմը, ավելի քան 10 տարի, կազմակերպում է ձկնորսության մրցումներ մերձակայանային ջրային տարածքներում: Մենք շատ ենք կարևորում նման միջոցառումները, քանի որ մեզ համար դա հնարավորություն է՝ ցույց տալու, որ միջուկային էներգիան էներգիայի մաքուր աղբյուր է, որ միջուկային տեխնոլոգիան և բնությունը լրացնում են միմյանց։ Եվ մենք ուրախ ենք, որ արտասահմանյան 9 երկրների մեր հյուրերը կարողացան ինքնուրույն համոզվել, որ մոտ կես դար գործող ատոմակայանի անմիջական հարևանությամբ ապրում են էկոլոգիապես մաքուր ձկներ»։
Made on
Tilda