Արմավիրի համայնքապետարանն իր աշխատանքներում աչքի է ընկնում հույժ գաղտնիությամբ։ Կայանալիք ավագանու նիստերի վերաբերյալ հայտարարությունները տեղադրված չեն կայքի հայտարարությունների բաժնում, դրանք տեղ են գտնում կայքի նորությունների բաժնում։ Համայնքապետարանի ոչ մի կայանալիք նիստի օրակարգ չի ներկայացվել հանրությանը, ինչը պահանջում է ՀՀ Տեղական ինքնակառավարման մասին օրենքի 15-րդ հոդվածը։ Մասնավորապես, հոդվածի առաջին մասը պահանջում է, որ Ավագանու հերթական նիստից առնվազն յոթ օր առաջ համայնքի ղեկավարը հրապարակում է ավագանու նիստի օրակարգի նախագիծը` նշելով նիստի անցկացման վայրը և ժամանակը: Հրապարակումն իրականացվում է համայնքներում` համայնքի ավագանու նստավայրում դրանք փակցնելու միջոցով, ինչպես նաև համայնքի կազմում ընդգրկված բոլոր բնակավայրերում:
Հետաքրքիր է 2026թ․ տարեկան բյուջեի հանրային քննարկման տեղեկացումը։ 2025թ․ դեկտեմբերի 8-ին տեղեկացվում է, որ 2025թ․ դեկտեմբերի 10-ին տեղի կունենա Արմավիր համայնքի 2026թ․ բյուջեի հանրային քննարկումը։
Ուշադրություն չդարձնենք հանրային քննարկման մասին տեղեկացման խախտված ժամկետին։ Նշենք, որ հանրային քննարկումը տեղի է ունեցել 2025թ․ դեկտեմբերի 10-ին և այդ մասին նույն օրը տեղեկացվել է հանրությանը։ Անհասկանալի է մնում մի հանգամանք՝ ինչպե՞ս էր հանրությունը քննարկում Արմավիր համայնքի 2026թ․ տարեկան բյուջեն, եթե այն կցված չէր հանրային քննարկման մասին հայտարարությանը։
Արմավիրի համայնքապետարանի պաշտոնական կայքն ուսումնասիրելիս կարելի է հանդիպել բազմաթիվ հետաքրքիր փաստերի։
Օրինակ, Արմավիր համայնքի մշտական բնակչության թիվը, համաձայն 2022թ․ մարդահամարի պաշտոնական տվյալների, կազմում է 50135, իսկ համաձայն Արմավիր համայնքի պաշտոնական կայքի տվյալների այդ թիվը 67793 է։
