—Թափառող շները վխտում են ամբողջ Արմավիր քաղաքով։ Շների ոհմակները դրսևորվում են տարբեր կերպ։ Կան ստերջացված (ականջակալով) շներ, որոնք ագրեսիվ են, հարձակվում են մարդկանց վրա և բազմանում։ Ո՞վ պետք է ապահովի հասարակության անվտանգությունը, որոնց մեջ կան խոցելի խմբեր, երեխաներ, ծերեր, հղի կանայք։
—Արմավիր համայնքը մարզի միակ համայնքն է, որտեղ աղբահանությունն իրականացվում է բաց երկաթե աղբամանների միջոցով։ Թեթև քամին բավարար է, որ աղբամանի պոլիէթիլենային տոպրակները ճախրեն ամբողջ քաղաքում։ Եթե քամի չկա, ուրեմն աղբամանը շների կողմից պետք է ենթարկվի տեսակավորման։ Արմավիր քաղաքի բնակիչներն աղբահանության համար ամենաբարձր գինն են վճարում համայնքապետարանին։ Շարքը շարունակելի է․․․
Մարզի բնակիչները, չունենալով բավարար տեղեկատվություն, անտարբեր են ինչպես ՏԻ մարմինների, այնպես էլ ՏԻՄ աշխատանքների նկատմամբ։ Հազվագյուտ մարդիկ գիտեն համայնքի ղեկավարի անունը, իսկ ավագանու գոնե մեկ անդամի անուն ոչ մեկից չլսեցինք։
Դժվար է ասել, ՏԻՄ գործելաոճի արդյունքո՞ւմ է, որ հասարակությունն անտարբեր է շուրջը կատարվող և անմիջապես իրեն վերաբերող, իր հարկերի հաշվին, բյուջեի միջոցներից ծախսվող գումարների նկատմամբ, թե՞ հենց քաղաքացու անտարբերությունն է հանգեցրել նրան, որ տեղական իշխանություններն իրենց ազատեն թափանցիկ ու հաշվետու լինելու բեռից։
