Գյուղատնտեսական տարին շուտով կավարտվի։ Գյուղացիական տնտեսություններն այս շրջանում հիմնականում զբաղված են կարտոֆիլի, սոխի, կաղամբի բերքահավաքով, այգեթաղի նախապատրաստական աշխատանքներով։ Արմավիրցիների համար գյուղատնտեսական սեզոնը սկսվեց ոչ այնքան բարենպաստ եղանակով ու կեռասի և ծիրանի բերքի սակավությամբ, ինչպես նաև կարկտահարության հետևանքով ապրանքային որակի անկմամբ։ Կեռասի բերքի սակավության պատճառով արտահանման մեծ ծավալներ չգրանցվեցին, այն հիմնականում սպառվեց տեղական շուկայում։ Ծիրանի արտահանման ծավալներն ավելի մեծ էին, սակայն, ըստ գյուղացիների, կարկուտի հետևանքով վնասված պտղի 50 տոկոսը վաճառքի ենթակա չէր։ Դեղձի մշակությամբ զբաղվող գյուղացիական տնտեսությունները նույնպես դժգոհում էին ցածր բերքատվությունից։ Հացիկցի Նվարդ Հովհաննիսյանի խոսքով, մեկ հեկտար դեղձի այգուց հավաքել է մոտ 1.5 տոննա բերք՝ այն դեպքում, երբ նախորդ տարի ստացել էր շուրջ 10 տոննա դեղձ։ Վաճառքի հետ կապված այստեղ նույնպես խնդիրներ չեն առաջացել։

Աշնան այս շրջանում գյուղացիները պատրաստվում են աշնանացանին և այգեթաղին։ Սպասում են ոռոգման ջրին՝ երբ բաց թողնվեց, այգիները կստանան աշնան վերջին ոռոգումն ու կսկսվի այգեթաղը։ Նշենք, որ ոռոգման ջուրը սեզոնի ընթացքում գյուղացիներին մատակարարվում է ընդատումներով, հիմնականում՝ 3 օր ջրամատակարարում, 3 օր դադար գրաֆիկով։ Մարզի շատ համայնքներում, երկու շաբաթ է, ոռոգման ջուր չկա։ Գյուղացիներն ասում են՝ ՋՕ ընկերությունները խոստացել են նոյեմբերի 1-ից բաց թողնել ջուրը, առանց դրա այգեթաղն ու աշնանացանը կազմակերպելն անհնար կլինի։